Respublika Ma’naviyat va ma’rifat markazi, Mudofaa vazirligi, Oliy ta’lim, fan va innovatsiyalar vazirligi, Xorazm viloyati hokimligi va Xorazm Ma’mun akademiyasi hamkorligida joriy yilning 6-noyabr kuni Urganch shahrida Jaloliddin Manguberdi siymosi misolida yosh avlodni vatanparvarlik ruhida tarbiyalashga qaratilgan simpozium oʻtkazildi.

Simpozium dasturiga binoan dastavval viloyat rasmiylari, mehmonlar, Mudofaa vazirligi xodimlari, ilmiy xodimlar, professor-oʻqituvchilar va talabalar ishtirokida Jaloliddin Manguberdi monumenti poyiga gulchambar qoʻyish marosimi oʻtkazildi.

Soʻngra viloyat hokimiyati kirish zalida tashkil qilingan Jaloliddin Manguberdi hayoti va faoliyatiga bagʻishlangan kitoblar hamda rasmlar koʻrgazmasida barcha mehmonlar, simpozium qatnashchilari ishtirok qildilar.

Dasturga binoan, koʻrgazmadan soʻng simpozium ishtirokchilari ilmiy ma’ruzalari tinglandi. Simpoziumning ma’ruzalar qismini Xorazm viloyati hokim oʻrinbosari Salayev San’atbek Kamilovich ochib berdi. Shundan soʻng soha mutaxassislari, Jaloliddin Manguberdi hayoti va faoliyati doirasida ilmiy izlanish olib boruvchi olimlar oʻz ma’ruzalari bilan ishtirok qildilar.